Arnar kynnti hóp sinn fyrir komandi vináttulandsleiki gegn Norður-Írlandi og Skotlandi í næsta mánuði. Þjóðin vill án efa sjá betri frammistöðu frá Strákunum okkar en í slæmu tapi gegn Kósóvó í mars, þar sem liðið féll úr B-deild Þjóðadeildarinnar.
Einn leikmaður sem fékk mikla gagnrýni eftir þá leiki var Aron Einar Gunnarsson, en hann er í hópnum fyrir komandi leiki einnig.
„Valið á Aroni Einari er umdeilt, sama hvað okkur finnst um það. Við erum með Hjört Hermannsson og ég get líka talað um Hlyn Frey Karlsson. Þetta er ungur hafsent sem er að spila á Norðurlöndunum,“ sagði Jóhann Már Helgason í Dr. Football.
Hlynur er fastamaður í lði Brommapojkarna í úrvalsdeildinni í Svíþjóð og Hjörtur hjá Volos í Grikklandi. Aron skrifaði hins vegar nýverið undir nýjan samning við Al-Gharafa í Katar og hefur hann spilað tvo leiki í bikarnum í þessum mánuði.
„Auðvitað hefur Aron aðeins verið að spila upp á síðkastið og kemur því vonandi betur stemmdur í þetta heldur en síðast. En maður setur spurningamerki við þetta,“ sagði Jóhann Már enn fremur.
