Hjörvar Hafliðason stjórnandi Dr. Football er ekki sammála því sem Arnar Gunnlaugsson landsliðsþjálfari hélt fram í gær að það skipti ekki máli hvort markmenn væru að spila eða ekki.
Umræðan snýst um það að Hákon Rafn Valdimarsson markvörður liðsins spilar lítið sem ekkert hjá Brentford í ensku úrvalsdeildinni.
Arnar er ekki á því að markvörður verði að spila til að vera í sínu besta formi.
„Mér fannst eitt áhugavert, hann var að ræða við Elvar á Fótbolta.net í gær og ræddi að fyrir markmenn skipti það ekki öllu máli að spila ekki allar helgar. Þeir fengu jafn mikið út úr æfingum og leikjum, ég ætla að kalla bullshit,“ sagði markvörðurinn fyrrverandi, Hjörvar.
Hann segir takt fyrir markmann vera allt og ekkert komi í staðin fyrir leik. „Ég hef staðið í marki og veit hvernig þetta virkar, taktur skiptir öllu. Það er ekki skotið á þig í leik kannski fyrir en á 18 mínútu, þegar þú ert búin að spila hverja helgi er það ekkert mál. Fyrirgjafir í leikjum er allt öðruvísi á æfingum, það er ekkert undir á æfingum.“
„Taktur skiptir öllu máli í markinu, það verður áhugavert að sjá hvort hann velji Hákon eða Elías. Ég bakka það bæði upp.“
Landsliðið kemur saman á Spáni á mánudag og mætir Kosóvó í tveimur áhugaverðum leikjum í Þjóðadeildinni.
