Grískir fjölmiðlar fara hamförum í dag eftir tap Panathinaikos gegn Víkingi í Sambandsdeild Evrópu í gær. Fá leikmenn og þjálfari liðsins hressilega á baukinn.

Tapið kom Grikkjum í opna skjöldu og er þessu líkt við harmleik.

„Til að skilja hveru ömurlegir Panathinaikos voru þá þarf bara að skoða leikinn eftir að þeir minnka muninn í 2-1. Í stað þess að elta jöfnunarmarkið fer liðið í að halda stöðunni eins og hugleysingjar. Þetta var eins og lið án heila, án þess að vera með nokkuð í raun,“ segir Nikos Athanasiou blaðamaður í Grikklandi.

Nikos hrósar Víkingum og því leikplani sem Sölvi Geir Ottesen teiknaði upp. „Leikmenn Víkings spiluðu eins og þetta væri þeirra síðasti leikur á ferlinum, sýndu hjarta, vilja, hugrekki og voru með plan í leiknum. Þeir niðurlægðu menn sem fá miklu meira borgað. Vel gert hjá þeim, þetta áttu þeir skilið. Skrifuðu söguna fyrir íslenska fótbolta.“

Nikos skrifar svo um stuðningsmenn Panathinaikos. „Það fóru 150 stuðningsmenn liðsins til Helsinki og borguðu mikla fjármuni fyrir. Stóðu með liðinu sínu í skítakulda og fara heim til Athenu með sorg í hjarta, þeir sáu hversu lélegt liðið var. Þeir eiga að fá endurgreitt og fá frítt á seinni leikinn.“

Seinni leikur liðanna fer fram eftir sex daga í Grikklandi þar sem stuðningsmenn Panathinaikos gera kröfu á að kvittað verði fyrir tapið í Helsinki í gær.