Jean-Philippe Mateta gæti verið á leið frá Crystal Palace næsta sumar, en samkvæmt Talksport er framherjinn farinn að skoða möguleikann á skiptum til ítalska stórliðsins AC Milan, sem hafa áhuga á Frakkanum.

Mateta hefur verið góður á tímabilinu og er með 7 mörk í 13 leikjum í ensku úrvalsdeildinni, en viðræður um nýjan samning hafa siglt í strand. Núverandi samningur hans rennur út 2027.

Talið er að leikmaðurinn vilji bíða og meta stöðuna eftir HM næsta sumar, en hann hefur skorað tvö mörk í þremur landsleikjum og er líklegur til að vera í hópi Didier Deschamps.

Mateta gekk til liðs við Palace frá Mainz árið 2022, fyrst á láni og svo endanlega. Hann átti erfitt uppdráttar til að byrja með á Englandi en hefur blómstrað með tímanum.