Steven Gerrard var í gær spurður út í það hvort hann væri mögulegur kandídati í að taka við keflinu af Arne Slot, stjóra Liverpool, ef sá hollenski yrði rekinn á tímabilinu.

Slot er sagður vera undir smá pressu í dag en gengi liðsins hefur ekki verið ásættanlegt í vetur eftir að hafa unnið deildina fyrir nokkrum mánuðum.

Gerrard er einn vinsælasti leikmaður í sögu Liverpool og er þjálfari í dag en hann er um þessar mundir atvinnulaus.

,,Ég verð mjög hreinskilinn hérna. Ég myndi hjálpa Liverpool í hvaða stöðu sem er, hvern einasta daga og á hverri einustu mínútu,“ sagði Gerrard.

,,Ég er tilbúinn að gera allt fyrir félagið. Ég vil hins vegar ekki að Arne Slot missi vinnuna. Ég vil að hann snúi þessu við og geri Liverpool að frábæru liði á nýjan leik.“

,,Það eru fimm mánuðir síðan ég var hoppandi og skoppandio um borgina þegar liðið vann ensku úrvalsdeildina.“