Mikið hefur verið rætt og ritað um þá staðreynd að Þorlákur Árnason sagði upp störfum hjá ÍBV sem þjálfari fyrir helgi. Þorlákur sagðist ekki geta sætt sig við að Alex Freyr Hilmarsson væri orðinn framkvæmdarstjóri knattspyrnudeildar.

Alex er leikmaður og fyrirliði ÍBV en þessi ástæða sem Þorlákur gefur upp fellur ekki í Vel Eyjamenn sem telja söguna ekki alveg vera svona.

Kristján Óli Sigurðsson las upp bréf í Þungavigtinni frá Vestmannaeyjum sem hann fékk, þar sem kom fram að Þorlákur hefði samþykkt það að ráða Alex Frey í starfið. Alex hafði misst vinnuna sína og vildi vera áfram í Eyjum, félagið þurfti því að aðstoða hann við að finna vinnu og samkvæmt þessu á Þorlákur að hafa samþykkt það.

Mikael Nikulásson tók þá til máls. „Ég er búin að fá nokkur skilaboð frá Eyjum eftir að ég var að mæra Láka á föstudag, ég fór kannski yfir strikið. Maður þarf að heyra báðar hliðar, það er skrýtið að hann mætir í Big Ben nánast klukkutíma eftir að hann tekur þessa ákvörðun. Ég er ánægður með, flestir hins vegar bíða með að láta heyra í sér. Hann mætti bara strax,“ sagði Mikael.

„Frá nokkrum í Eyjum þá er skitan hjá Láka, hann hafi í tvígang samþykkt það að Alex tæki við þessu. Eins og þetta lítur út fyrir Eyjamönnum, þá eru þeir pottþéttir á því að Þorlákur hafi nýtt þetta dæmi til að koma sér út.“

„Það eru nokkrir Eyjamenn búnir að senda á mig, þeir eru ekki sáttir og telja að það sé brotið á sér í umræðunni.“