Áhugi stórliða á Angelo Stiller, leikmanni Stuttgart, eykst sífellt. Real Madrid, Manchester United, Liverpool, Bayern Munchen og Borussia Dortmund eru öll sögð fylgjast með stöðu Þjóðverjans.

Fabian Wohlgemuth, íþróttastjóri Stuttgart, segir að engin formleg tilboð hafi borist, þrátt fyrir vaxandi áhuga. „Hann er með samning hjá okkur og það er of snemmt að ræða eitthvað slíkt,“ segir hann við Sky.

Stiller, sem er 24 ára gamall miðjumaður, hefur átt glæsilegt tímabil og verið einn besti miðjumaður deildarinnar. Hann lék 47 leiki á síðustu leiktíð, skoraði fjögur mörk og átti 11 stoðsendingar, auk þess að leiða Stuttgart í sigri í þýska bikarnum. Hann hefur einnig unnið sér sæti í þýska landsliðinu.

Real Madrid er talinn líklegasti áfangastaðurinn og spænskir miðlar fullyrða að Xabi Alonso sjái hann sem Toni Kroos týpu á miðju sína. Stiller sjálfur er sagður heillast af Madríd frekar en enska boltann.

Stiller er samningsbundinn Stuttgart til 2028. Samningurinn inniheldur losunarklásúlu upp á um 40 milljónir evra sem tekur þó ekki gildi fyrr en 2026.

Þýskir miðlar fullyrða að Stuttgart muni krefjast að minnsta kosti 50 milljóna evra ef félög reyni að ná í hann næsta sumar. Stiller er sagður ánægður hjá Stuttgart, en jafnframt opinn fyrir því að taka næsta skref þegar rétti tíminn kemur.