Wayne Rooney segir að Írar hafi fagnað of mikið eftir 3–2 endurkomusigur á Ungverjalandi um helgina. Sigurinn, ásamt 2–0 heimasigri á Portúgal og Cristiano Ronaldo í síðustu viku, tryggði liðinu umspilssæti og útileik gegn Tékklandi í undanúrslitum. Vonir um HM 2026 lifa því góðu lífi.

„Mér fannst þetta aðeins yfir strikið,“ sagði Rooney í Stick To Football.

„Ég skil það, en fagnaðarlætin voru þannig að ég hélt þeir hefðu þegar tryggt sig áfram.“

Fyrrverandi liðsfélagi hans hjá Manchester United, Roy Keane, var þó fljótur að bregðast við. Keane benti á að liðið hefði átt í basli árum saman og að sigur með síðustu spyrnu leiksins væri risastórt augnablik fyrir þjóðina.

„Írarnir hafa verið hrikalega slakir síðustu ár,“ sagði Keane.

„Að vinna í Ungverjalandi með síðasta skoti leiksins. Auðvitað er mikið verk eftir til að komast áfram, en ég neita þeim ekki um þennan gleðimola.“

Keane lagði áherslu á mikilvægi þess að lyfta andanum í kringum landsliðið, sem hefur átt í erfiðleikum bæði undir stjórn Stephen Kenny og í byrjun ferils Heimis Hallgrímssonar. „Að fá tvo stórsigra í röð, fyrst Portúgal og svo Ungverjaland, er gríðarlega mikilvægt. Ef menn geta ekki notið svona augnablika, hvenær þá?“

Rooney tók undir að hluta. „Ég skil hvað Roy er að segja. Mér fannst samt aðeins of mikið í þetta farið.“

Keane minnti að lokum á að áskorunin væri nú útileikur í umspilinu, prófraun sem Írar hafa oft átt erfitt með.