Íþróttafélagið Grótta er á meðal þeirra sem minnast Hrafnhildar Thoroddsen, sem féll frá fyrir viku síðan. Hún var starfsmaður félagsins í yfir áratug.

„Það er með miklum söknuði sem við kveðjum kæran og duglegan samstarfsmann og vin,“ segir meðal annars í minningarorðum Gróttu um Hrafnhildi, sem var 51 árs gömul er hún féll frá.

„Bros hennar og hlýlegt viðmót voru einkenni hennar en hún var alltaf tilbúin að rétta hjálparhönd þegar þess þurfti. Þeir sem þekktu hana vita hversu mikill kraftur, jákvæðni og ákveðni bjó í henni. Hún lét alltaf til sín taka þegar hún var í húsinu og ekkert virtist geta stöðvað hana í að leggja sitt af mörkum.“

Þá er fjallað um andlát Hrafnhildar í Morgunblaðinu frá því í gær. Þar kemur meðal annars fram að árið 2007 hafi hún, ásamt móður sinni, sett á fót Mænuskaðastofn­un Íslands sem hef­ur það hlut­verk að vekja at­hygli á mænuskaða og þrýsta á að lækn­ing finn­ist við hon­um.

Sjálf lenti Hrafnhildur í al­var­legu bíl­slysi árið 1989 og lamaðist fyr­ir neðan mitti. Sex árum síðar kom hingað til lands kín­versk­ur skurðlækn­ir, Zhang Shaocheng, og gerði til­raunaaðgerðir á Hrafn­hildi ásamt Hall­dóri Jóns­syni bæklun­ar­lækni, þáver­andi yf­ir­lækni bæklun­ar­deild­ar Land­spít­al­ans, sem fólust í því að tengja mill­irifjataug­ar fram hjá mænuskaðanum og tengja þær ásamt tauga­bút úr fæti við mænu­taglið.

Eft­ir þetta fór Hrafn­hild­ur í nokkr­ar lækn­is­meðferðir til Rúss­lands, Frakk­lands og Bret­lands. Gat hún þá gengið í spelk­um fyr­ir neðan hné í göngugrind. Svo kom að beinþynn­ing­unni sem all­ir lamaðir fá. Hún fór að brotna á fót­um og þegar hún hafði brotnað sex sinn­um ákvað hún að setj­ast al­farið í hjóla­stól­inn.