Arnar var í gær ráðinn þjálfari íslenska karlalandsliðsins eftir stórkostlegan tíma í Víkinni. Breytti hann Víkingi í lið sem barðist um titla á hverju ári, vann Íslandsmeistaratitilinn í tvígang undir hans stjórn, bikarmeistaratitilinn fjórum sinnum og er nú komið í útsláttarkeppni Sambansdeildarinnar.
„Ég vissi ekki hvert ég ætlaði þegar mér var tjáð að Víkingur ætlaði að ráða Arnar Gunnlaugsson sem þjálfara liðsins veturinn 2018. Fyrri störf hans gerðu mig frekar tortrygginn. En, ég átti alltaf eftir að prófa að hafa rangt fyrir mér þegar kemur að íþróttum og er ég feginn að hafa eytt því þarna út fyrir sjö árum síðan,“ skrifar Tómas á Facebook-síðu sína.
„Ég hef alltaf sagt, og meina það, að bikarinn 2019 og fótboltinn sem liðið spilaði þá dugði mér fyrir lífstíð en ég slæ ekki höndinni á móti öllu hinu sem fylgdi. Ísland er að fá frábæran mann og þjálfara og verður í meira lagi gaman að sjá íslenska liðið undir stjórn Arnars. Takk fyrir mig.“
Arnar tekur við landsliðsþjálfarastarfinu af Age Hareide og stýrir sínum fyrstu leikjum í umspili Þjóðardeildarinnar í mars. Það má búast við að aðstoðarmaður Arnars í Víkinni, Sölvi Geir Ottesen, taki við af honum þar.
