Roy Keane segir það ekki koma sér á óvart að Nottingham Forest hafi ákveðið að reka Nuno Espirito Santo þrátt fyrir að hann hafi komið liðinu í Evrópukeppni á síðasta tímabili.

Portúgalinn tók við Forest í desember 2023 og leiddi liðið í Evrópu í fyrsta sinn á þessari öld, en samskipti hans við eigandann Evangelos Marinakis voru orðin stirð. Nuno hafði gagnrýnt leikmannastefnu félagsins opinberlega í sumar og viðurkennt að samband hans við eigandann væri ekki eins gott og áður.

Aðeins örfáum dögum eftir að Marinakis hafnaði því að einhver ágreiningur væri milli þeirra, var tilkynnt um brottrekstur Nuno í yfirlýsingu frá félaginu snemma á þriðjudagsmorgun. Þar var vísað til „nýlegra aðstæðna“.

Forest brást strax við og skipaði fyrrum Tottenham-stjórann Ange Postecoglou sem eftirmann Nuno. Hann mun stýra liðinu í næsta leik gegn Arsenal eftir landsleikjahlé.

Roy Keane tjáði sig um málið í breskum fjölmiðlum: „Ég er ekki hissa. Af hverju ætti nokkur að vera hissa á því sem gerist hjá Nottingham Forest?,“ segir Keane sem er fyrrum leikmaður félagsins.

„Við vitum alveg hvernig eigandinn er og mér finnst enginn stjóri sem fer þangað eiga von á öðru en pressu. Ég hef enga vorkunn fyrir þá. Þetta var fyrirsjáanlegt.“