Fyrrum varnarmaður Manchester United og enska landsliðsins, Rio Ferdinand, hefur afhjúpað ástæðurnar að baki því að hann ákvað nýverið að flytja til Dubai með fjölskyldu sinni, aðeins nokkrum mánuðum eftir að hann hætti sem sparkspekingur hjá TNT Sports.

Ferdinand, sem er 46 ára, greindi frá því í maí að hann myndi yfirgefa TNT Sports eftir 10 ár í hlutverki sérfræðings, til að einbeita sér að viðskiptatækifærum sínum.

Þrátt fyrir að sonur hans, Lorenz, sem er 19 ára, hafi skrifað undir sinn fyrsta atvinnumannasamning við Brighton í júlí, hefur Ferdinand ákveðið að setjast að í Sameinuðu arabísku furstadæmunum með eiginkonu sinni, Kate, og börnum þeirra.

„Það er ekki ein ástæða,“ sagði Ferdinand í viðtali við The National. „Ég fór hinga vegna Global Soccer Awards um jólin og hafði ekki komið almennilega til Dubai í sjö eða átta ár. Ég var oft hérna árum. Við eyddum tíma með vinkonum Kate sem búa hér og ég sá allt öðruvísi hlið á borginni. Ég á líka fyrirtæki hérna, Football Escapes.“

Hann bætir við að lífsgæðin í Dubai hafi haft mikið að segja: „Hér er lífið öruggt, veðrið gott og börnin blómstra. Mér fannst tími til kominn á nýjan kafla. Ég hef unnið við sjónvarpsþáttagerð frá því ég hætti í boltanum fyrir rúmum áratug, en núna langaði mig að slíta tenginguna við leikjadagatalið. Ég er ekki hættur í fótboltanum, en hann stjórnar ekki lengur lífi mínu og það er góð tilfinning.“

Ferdinand segir einnig að menntun barnanna hafi vegið þungt í ákvörðuninni. Hann og Kate eiga saman synina Cree, 4 ára, og Shae, 2 ára. Hún er jafnframt stjúpmóðir barna hans frá fyrra hjónabandi, Lorenz, Tate (17 ára) og Tiu (14 ára).

„Við fórum aftur út í febrúar til að skoða skóla, bara til öryggis. Það kveikti á einhverju hjá mér. Skólakerfið þar úti virkar öðruvísi, meira í takt við þarfir barna minna. Það notar ensku námskrána, en útfærslan er önnur. Mér finnst eins og kennarar í Bretlandi séu oft vanmetnir og fá illa borgað,“ sagði Ferdinand.