Höskuldur Gunnlaugsson, fyrirliði Breiðabliks, er vel stemmdur fyrir umspilseinvíginu gegn Virtus frá San Marínó um sæti í Sambandsdeildinni.

„Ég er mjög peppaður. Við erum staðráðnir í að eiga orkumikla og góða frammistöðu á morgun sem mun leiða af sér góð úrslit,“ segir hann í samtali við 433.is, en fyrri leikurinn fer fram í Kópavogi á morgun.

Blikar þekkja þessa stöðu vel, en þeir fóru í riðlakeppni Sambandsdeildarinnar fyrir tveimur árum. Hjálpar það þeim nú?

„Það er kannski gott upp á spennustigið, að vita að þetta eru tveir leikir og að einvígið er ekki að fara að vinnast á fyrstu tíu mínútunum. Við þurfum að halda kúlínu og stjórn á leiknum.“

Virtus er fremur óþekkt stærð frá lágt skrifuðu fótboltalandi. En það ber ekki að vanmeta liðið.

„Maður veit auðvitað ekki mikið um þetta lið og það er ekki hátt skrifað. En þeir eru komnir á þetta stig og trú getur flutt fjöll. Ég veit að þeir mæta líka vel peppaðir.“

Blikar hafa ekki unnið leik í meira en mánuð og var Höskuldur spurður út í þetta erfiða gengi.

„Það er öllu verra ef það eru slæm úrslit í kjölfar lélegrar frammistöðu. Ef við lítum til dæmis til Valsleiksins getur þú alveg litið í spegil og sjálfsmyndin er ekkert svert, því þetta var bara flott frammistaða en datt ekki. Öllu alvarlegri er frammistaða eins og gegn FH.“

Ítarlegt viðtal er í spilaranum.