Breiðablik mætir Virtus frá San Marínó í umspili um sæti í Sambandsdeildinni í vetur annað kvöld. Halldór Árnason, þjálfari lisðins, ræddi við 433.is í dag að því tilefni en var hann einnig spurður út í gengi Blika undanfarnar vikur.
Breiðablik hefur ekki unnið leik í meira en mánuð, tapað tveimur Evrópueinvígum og er fimm stigum á eftir toppliði Vals í Bestu deildinni. Halldór var spurður að því hvað hann telji hafa farið úrskeiðis í undanförnum leikjum.
„Ég skal setjast með það í tvo klukkutíma og fara yfir það, ef við viljum fara í einhverja alvöru greiningu. Einfalda svarið er bara að niðurstaða leikjanna hefur ekki verið nógu góð. Það er hægt að tala endalaust um ef og hefði. Fjórir af þessum leikjum eru á móti gríðarlega sterkum erlendum liðum,“ sagði Halldór og hélt áfram.
„Það eru leikir þar sem við höfum gert nóg að mínu mati til að verðskulda sigra en einnig leikir og kaflar í leikjum sem hafa verið mjög slæmir. Í síðasta leik (gegn FH) fáum við mikið af færum og skorum fjögur mörk en þá slekkur vörnin á sér, sem hefur kannski ekki verið vandamálið í sumar. Ég myndi halda að það sé að miklu leyti til andlegt dæmi. Þegar þú ert að spila svona mikið og æfir ekki neitt verður leikdagur bara einhver groundhog day. Við þurfum að hafa fyrir því að halda mönnum á tánum. Leikdagur er mjög sterkt concept í huga fótboltamanna sem má ekki fjara út í að verða enn einn dagurinn á skrifstofunni, sem mér fannst svolítið vera staðan í FH-leiknum. Það var eins og að mæta á æfingu, sem eru auðvitað vonbrigði. Við höfum virkilega reynt að halda mönnum á tánum. En vonandi mæta menn með gamla góða leikdags-fílinginn á morgun og verða klárir í þetta,“ sagði Halldór, en dagskráin hefur verið þétt.
Stuðningsmenn Blika eru margir hverjir kröfuharðir eftir frábært gengi undanfarin ár. Einhverjir hafa látið í sér heyra undanfarið á samfélagsmiðlum vegna slæms gengis.
„Mér finnst þú ósanngjarn gagnvart hinum almenna Blika að tala um einhver tvö Tweet þegar það eru örugglega 50 þúsund manns eða eitthvað sem halda með Breiðabliki. Ef þú talar við alla stuðningsmenn og kemur svo með prósentuna yfir þá sem eru ósáttir skal ég ræða þetta við þig. Við getum ekki verið að pæla í því maður,“ sagði Halldór, spurður út í þetta.
Ítarlegt viðtal við Halldór er í spilaranum.
