Tim Howard, fyrrum markvörður Manchester United, hefur skotið föstum skotum á lið Middlesbrough sem leikur í næst efstu deild Englands.

Boro gerði sér vonir um að fá varnarmanninn Max Arfsten í sínar raðir í sumar en hann spilar með Columbus Crew í Bandaríkjunum.

Talið er að Boro hafi boðið um tvær milljónir punda í Arfsten en hann er einn af efnilegustu varnarmönnum Bandaríkjanna.

Columbus var ekki lengi að hafna þessu boði Boro og eru líkur á að Arfsten kosti allt að 8-10 milljónir punda.

,,Middlesbrough, maður minn lifandi, borgið okkur eins og þið skuldið okkur eitthvað. Þetta tilboð var galið,“ sagði Howard.

,,Þið vitið að þetta er ungur og efnilegur landsliðsmaður, ekki rétt? Hann mun líklega spila á HM á næsta ári ef spilamennskan heldur svona áfram.“

,,Heimurinn þarf að vakna, þetta er blaut tuska í andlitið.“