„Þetta er félagslegt ójafnvægi í samfélaginu, þetta er gjarnan fólk án vinnu, þetta eru fyrst og fremst karlmenn, þetta er eiginlega og algjörlega bundið við karla og unga karla oftast nær, og í þessum skrílslátum fá menn útrás fyrir reiði út í allt og alla, en kannski ekki síst samfélagið og sína eigin stöðu. Hvort sem samfélagið ber ábyrgð á því eða ekki þá finna menn þessu farveg,“ segir Sigurður Sverrisson, knattspyrnuáhugamaður frá Akranesi, sem búsettur er á Englandi. Hann ræddi við Morgunvaktina á Rás 1 í morgun, um skrílslæti og ofbeldi á meðal stuðningsmanna knattspyrnuliða.
Sigurður ræddi þetta vandamál eins og það birtist á Englandi en tilefni umfjöllunarinnar eru skrílslæti stuðningsmanna danska liðsins Bröndby í Reykjavík í síðustu viku, í kjölfar þess að Bröndby tapaði mjög óvænt gegn Víkingi, 3:0.
„Þó svo að skrílslæti í fótboltanum hérna í Englandi hafi svona hægt og rólega verið að fjara út og gerði það allt fram að Covid, þá varð heilmikil fjölgun í þessum tilvikum aftur eftir Covid, og sem má þá auðvitað tengja beint við uppsafnaða gremju – eða hvað getum við kallað þetta – frústrasjón hjá fólki eftir það ástand. Hér var allt læst og lokað á annað ár. Svo það varð töluverð fjölgun. Þessi skrílslæti hafa síðan færst út í það allra síðustu tvö þrjú árin yfir í að beinast gegn innflytjendum.“
Sigurður segir einnig að áfengisneysla og hópþrýstingur leiki hér stórt hlutverk.
Einnig var rætt við knattspyrnukappann Kjartan Henry Finnbogason sem á langan atvinnumannsferil að baki og lenti meðal annars illa í áðurnefndum áhangendum danska liðsins Bröndby. Kjartan telur að orsakir skrílsláta á knattspyrnuvöllum í Danmörku eigi sér síður rætur í þjóðfélagslegri reiði og stéttaskiptingu, eins og á Bretlandi, heldur að menn séu einfaldlega að grípa tækifæri til að haga sér illa. Ennfremur spili inn í mikið og gróið hatur á milli áhangenda stórra liða sem teljist vera erkifjendur.
Kjartan Henry lék um skeið með danska liðinu AC Horsens. Í lokaleik sínum með félaginu, árið 2018, kom hann inn á sem varamaður í leik gegn Bröndby, og skoraði tvö mörk. Breytti hann stöðunni úr 0:2 fyrir Bröndby í 2:2, leiknum lauk með jafntefli og þetta gerði Bröndby skráveifu í titilbaráttunni þetta árið. Sjá nánar hér.
Fótboltabullur úr stuðningsmannahópi Bröndby trylltust eftir leikinn og beindu hatri sínu í garð Kjartans Henry sem hafði „rænt“ þá tveimur stigum með stórkostlegum mörkum sínum undir loks leiksins.
„Þeir fór inn á völlinn, þeir ætluðu að ráðast á eigin leikmenn, þeir ætluðu síðan að ráðast á mig og auðvitað liðið. Við þurftum að vera inni í búningsklefa, lögreglan bannaði okkur að fara út, bannaði okkur að fara heim.“
Kjartan Henrý útskýrir síðan að heimilisföng og símanúmer fólks séu sjálfkrafa skráð á netið nema maður afskrái sig sérstaklega. Verstu bullur Bröndby-liðsins fundu heimilisfang hans og héldu þangað:
„Þeir voru komnir fyrir utan heima hjá mér, sem var svona tíu mínútna labb. Konan mín var heima á Íslandi, við vorum með Au pair sem var að hjálpa okkur. Hún var auðvitað mjög hrædd því það voru þarna menn með tattú í andlitinu, öskrandi og bankandi á rúður og annað. Og ég mátti ekki fara út af vellinum, þannig að þetta var mjög, mjög óþægilegt.“
Þegar Kjartan Henry komst heim voru bullurnar á bak og burt en höfðu unnið einhverjar skemmdir á eigninni. Hann segist síðan reglulega hafa engið rafrænar hótanir frá boltabullum Bröndby en hann það komi honum ekki úr jafnvægi. Þessi uppákoma hafi hins vegar verið mjög óþægileg.
Hlusta má á þáttinn hér. Umfjöllunin byrjar á: 1:13:14
