Ásgerður Stefanía Baldursdóttir hefði horft til tveggja reynslubolta í vali sínu á íslenska landsliðshópnum fyrir EM, sem ekki voru valdir.

Adda, eins og hún er kölluð, mætti í spjall við 433.is og hitaði upp fyrir mótið. Þar var hún spurð að því hvort hún saknaði einhverra nafna í þeim 23 manna hópi sem heldur á EM, sem hefst á miðvikudag.

„Ég hefði horft til Fanndísar (Friðriksdóttur) og Berglindar (Bjargar Þorvaldsdóttur). Þar erum við með öðruvísi leikmenn en eru til staðar í hópnum.“

Báðar spila þær hér heima, Fanndís með Val og Berglind með Breiðabliki. Báðar eiga þær fjölda landsleikja en sú fyrrnefnda var nokkuð óvænt í hópnum í Þjóðadeildinni á dögunum.

„Fanndís er öðruvísi kantmaður og mér fannst við sjá það í Frakkaleiknum að hún getur gefið okkur ýmislegt, haldið vel í boltann og er mjög reynslumikil,“ sagði Adda.

Hvað Berglindi varðar benti hún á að íslenska liðið hefði í raun ekki hreina níu með sér á EM í Sviss.

„Ef við þurfum mark í einhverjum leik og erum að dæla boltum inn á teiginn eru fáir betri í því en Berglind. En auðvitað þarf að horfa í það að Ísland spilar allt öðruvísi fótbolta en Breiðablik. Breiðablik er í eða við teiginn mest allan leikinn og þar blómstrar Berglind. Í íslenska landsliðinu erum við töluvert að verjast.

Það eru 23 leikmenn í þessum hópi og ég hefði viljað sjá þær tvær. En það er auðvitað erfiðara að velja einhvern til að taka út.“

Dagskrá Íslands á EM
2. júlí gegn Finnlandi
6. júlí gegn Sviss
10. júlí gegn Noregi