Arsenal virðist vera að klára kaupin á Christian Norgaard, fyrirliða Brentford. Þetta kemur fram í helstu miðlum, til að mynda hjá David Ornstein og Fabrizio Romano.
Arsenal þarf að styrkja miðsvæðið þar sem Jorginho er farinn og Thomas Partey einnig á förum þegar samningur hans rennur út í næstu viku.
Martin Zubimendi er að ganga í raðir félagsins frá Real Sociedad og nú virðist Norgaard einnig vera á leiðinni.
Danski landsliðsmaðurinn vill ólmur ganga í raðir Arsenal og hefur samið um kaup og kjör við félagið nú þegar.
Þá virðist sem svo að Brentford sé nálægt því að hleypa honum burt eftir tæplega 10 milljóna punda tilboð Arsenal í þennan 31 árs gamla miðjumann.
Norgaard hefur verið í Brentford í sex ár og verið mikilvægur hlekkur í miklum uppgangi félagsins á þeim tíma.
