Kyle Walker, nýr leikmaður AC Milan, ræddi við fjölmiðla í kjölfar skipta sinna til Ítalíu.
Bakvörðurinn 34 ára gamli yfirgaf Manchester City eftir hátt í átta ár hjá félaginu og gekk í raðir Milan á láni út tímabilið. Hann hefur verið í vandræðum innan vallar á leiktíðinni og þá eru vandræði utan hans ekki að hjálpa til.
„Mig langaði að prófa eitthvað nýtt. Mig langaði að sýna að ég gæti staðið mig á Ítalíu sem og á Englandi,“ sagði Walker.
Hann viðurkennir að það hafi ekki verið auðvelt að yfirgefa City og kveðja knattspyrnustjórann Pep Guardiola.
„Það var erfitt að ræða við Guardiola. Það er mikil virðing á milli okkar og við unnum mikið saman. Manchester City var fjölskylda mín og ég held að allir kunni að meta hvernig ég stóð mig.
En nú hugsa ég bara um AC Milan. Mig langar að læra ítölsku og vinna eitthvað hér líka.“
Walker er spenntur fyrir komandi tímum með Milan.
„Félagið hefur mikinn metnað. Við unnum ofurbikarinn, það er gott merki. Við erum að gera mjög vel í Meistaradeildinni en við þurfum að bæta okkur í deildinni.“
