Það er allt vitlaust á bak við tjöldin hjá Chelsea eftir myndband sem Enzo Fernandez, leikmaður liðsins, birti er hann fagnaði sigri í Copa America með liðsfélögum sínum í argentíska landsliðinu. The Sun fjallar um málið.

Liðið var að fagna sigrinum þegar Fernandez reif upp símann og tók sig og aðra leikmenn Argentínu upp syngja lag með texta sem er vægast sagt niðrandi í garð Frakka sem eru dökkir á hörund.

Meira
Sjáðu myndband stórstjörnunnar sem hefur verið harðlega gagnrýnt – „Mamma þeirrra er frá Kamerún og pabbi þeirra frá Nígeríu“

Margir Frakkar eru í liði Chelsea og eru þeir, sem og fleiri innan hópsins, sagðir brjálaðir út í Fernandez, sem hefur þó sent frá sér yfirlýsingu þar sem hann baðst innilegrar afsökunar.

Einhverjir leikmenn Chelsea hafa hætt að fylgja argentíska miðjumanninum á Instagram og samkvæmt fréttum í dag mun mikil vinna fara í það að laga andrúmsloftið í klefanum.

Chelsea heldur til Bandaríkjanna á mánudag, þar sem liðið mun spila æfingaleiki til að undirbúa sig fyrir komandi leiktíð.