Sjónvarpsmaðurinn Andri Már Eggertsson, Nablinn, var gestur í nýjasta þætti af Íþróttavikunni. Helgi Fannar Sigurðsson og Hrafnkell Freyr Ágústsson hafa umsjón með þættinum.
Það var rætt um Bestu deild karla í þættinum og þar á meðal stórleik KR og Vals á dögunum, sem lauk með 3-5 sigri síðarnefnda liðsins.
„Að horfa á fyrri hálfleikinn var eins og að horfa á yngri flokka leik eða einhverja gæja að leika sér,“ sagði Helgi, en staðan í hálfleik var 2-4.
„Valsarar byrja fáránlega en einhvern veginn hafði maður alltaf trú á að þeir kæmu til baka. Maður vissi að það væri ekki séns að KR myndi halda hreinu svo við myndum alltaf fá einhverja spennu. En maður bjóst ekki alveg við þessu gjaldþroti,“ sagði Hrafnkell áður en Helgi tók til máls á ný.
„Það er ekki eðlilegt hversu oft í hverjum leik KR er í nauðvörn, þar sem síðasti maður kastar sér fyrir boltann. Þetta má alveg gerast 1-2 í leik en þetta er bara að gerast endalaust.“
Hrafnkell tók undir þetta.
„Þetta er alltof kaotískt og þeir verða að laga það.“
Mikið hefur verið rætt og ritað um stöðu Gregg Ryder þjálfara KR. Andri telur sæti hans þó öruggt fyrst KR-ingar tóku ekki í gikkinn í upphafi landsleikjahlésins.
„Þetta hlýtur að hita sætið en ef þeir reka hann ekki núna í landsleikjahléinu þá gera þeir það ekki strax. En þetta snýst líka bara um hvað er á lausu. Ef Óskar Hrafn Þorvaldsson er ekki á lausu, hvað er þá í boði?“
Helgi sagði þá að Óskar væri búinn að taka við KR, hefði hann áhuga.
„Hann myndi bara banka upp á og segja honum að hann tæki þetta og þá væri það bara þannig. En ég held að Óskar taki þetta ekki, ég held hann reyni að fá eitthvað giggi úti fyrst,“ sagði Hrafnkell þá.
Umræðan í heild er í spilaranum.
Íþróttavikan er í boði Bola léttöl og Lengjunnar