Tveimur leikjum er lokið það sem af er kvöldi í 9. umferð Lengjudeildar karla.
Keflavík tók á móti Njarðvík í suðurnesjaslag og komust heimamenn yfir eftir um stundarfjórðung með marki Ásgeirs Páls Magnússonar. Staðan í hálfleik var 1-0.
Arnar Helgi Magnússon svaraði þó fyrir Njarðvík eftir tæpan klukkutíma leik og 1-1 jafntefli varð lokaniðurstaðan.
Njarðvík er áfram á toppi deildarinnar með 20 stig en Keflavík er í því fimmta, síðasta umspilssætinu, með 11 stig.
Grindavík vann þá flottan sigur á ÍBV eftir fjörugar lokamínútur. Dennis Nieblas gerði eina mark fyrri hálfleiks fyrir Grindavík en meira var ekki skorað fyrr en tíu mínútur lifðu leiks. Þá tvöfaldaði Dagur Ingi Hammer Gunnarsson forskot heimamanna.
Vicente Valor minnkaði muninn fyrir Eyjamenn áður en Kwame Quee innsiglaði 3-1 sigur Grindvíkinga.
Grindavík er í þriðja sæti deildarinnar með 13 stig, jafnmörg og ÍBV sem er sæti neðar.
