KR hefur staðfest ráðningu félagsins á Óskari Hrafni Þorvaldssyni. Hann verður í starfi ráðgjafa en miðað við tilkynningu KR verður hann hálfgerður yfirmaður knattspyrnumála.
Óskar sagði upp hjá Haugesund í Noregi á dögunum eftir að hafa stýrt örfáum leikjum. Var ágreiningur milli hans og félagsins sem orsakaði það.
Áður var Óskar þjálfari Breiðabliks í fjögur ár en þar á undan hafði hann stýrt Gróttu. Óskar er uppalinn KR-ingur og snýr nú heim.
„Það er knattspyrnudeild KR sérlega ánægjulegt að tilkynna að Óskar Hrafn Þorvaldssonar hefur verið ráðinn til starfa hjá deildinni. Óskar mun m.a. veita þjálfurum og starfsmönnum deildarinnar faglega ráðgjöf og vinna að endurskipulagningu deildarinnar;“ segir á vef KR.
Óskar hafði verið orðaður við þjálfarastöðuna í KR en ljóst er að hann tekur ekki við henni í bráð.
