Rúnar Páll Sigmundsson, þjálfari Fylkis, viðurkennir að hans lið hefði ekki getað fengið mikið erfiðara verkefni en að mæta Víkingi í 8-liða úrslit Mjólkurbikar karla.

Rúnar ræddi við 433.is eftir að dregið var í 8-liða úrslitin í Laugardalnum í gær. Víkingur hefur unnið bikarinn undanfarin þrjú ár og einnig 2019, en keppnin var blásin af 2020 vegna kórónuveirunnar.

„Það gerist ekki erfiðara en það er bara gaman. Ég hef alltaf trú á mínum mönnum. Þetta er ólík keppni og við gerum okkar besta í að stöðva þeirra vegferð í bikarnum. Það getur allt gerst í þessari keppni,“ sagði Rúnar.

Hans menn hafa átt erfitt uppdráttar í Bestu deildinni og eru aðeins með eitt stig eftir sjö leiki. Rúnar hefur þó fulla trú á að liðið snúi blaðinu við, frammistöðurnar gefi það til kynna.

„Ég hef talað um það að við höfum spilað marga þessa leiki mjög vel en ekkert fengið út úr því. Vonandi breytist það. Það gerist ekkert að sjálfu sér. Við þurfum að hafa mikið fyrir hlutunum og það er ekkert minna núna. Það er ekkert launungarmál að við þurfum að fara að fá stig.

En það er enn þá maí og við höldum áfram. Við reynum að byggja ofan á frammistöðurnar sem við höfum fengið. Við þurfum að reyna að loka fyrir markið okkar. Við erum að fá allt of ódýr mörk á okkur, sem er alls ekki nógu gott,“ sagði Rúnar.

Viðtalið í heild er í spilaranum.