Íþróttavikan er á sínum stað þennan föstudaginn líkt og alltaf. Hörður Magnússon og Edda Sif Pálsdóttir fara yfir allt það helsta.

Hörður er einn dáðasti íþróttalýsandi landsins og Edda Sif er ein af stjörnum RÚV þegar kemur að umfjöllun um íþróttir.

Rætt var um karlalandsliðið sem síðar í mars fer í verkefni um að komast inn á Evrópumótið.

„Þetta er 50/50 á móti Ísrael, þeir eru í skrýtinni stöðu. Þeir standa í stríði, við virðumst lenda á móti liðum sem eru í stríðum. Ef við vinnum þá er það líklega Úkraína,“ segir Hörður um málið

„Það eru teikn á lofti, lykilmenn ekki mikið að spila. Hákon Arnar byrjaði reyndar og skoraði síðustu helgi, sem er jákvætt. Orri Steinn er í kuldanum hjá FCK sem kemur mikið á óvart.“

Edda Sif segir mörgum spurningum ósvarað. „Þetta eru mörg spurningarmerki og smá bútasaumur.“

Gylfi Þór Sigurðsson og Aron Einar Gunnarsson eru stór spurningarmerki fyrir verkefnin. „Hann hefur talað þannig að hann vilji hafa þá, not matter what. Þetta er orðnir tíu mánuðir hjá Aroni án leiks með félagsliði.“

Hörður segir það vera sérstakt ef þeir verði í hópnum, „Mér finnst sérstakt ef Aron og Gylfi spila, ef við getum fengið 30 mínútur út úr Gylfa. Aukaspyrna til að koma okkur á EM, þá væri það kannski gott.“