Ársþing KSÍ fer nú fram og er ljóst að breytingu leikmannasamtakanna hefur verið hafnað.
Arnar Sveinn Geirsson talaði fyrir hönd samtakanna á þinginu í dag og lagði til að samningum leikmanna í efstu og næst efstu deild yrði breytt.
Leikmannasamtökin lögðu til að lágmarkslaun yrðu 75 þúsund krónur í næst efstu deild og þá 100 þúsund í efstu deild.
Þeirri tillögu var hafnað sem og að lið efstu deildar myndu fá 14 daga frí frá æfingum um sumartímann.
Arnar lagði síðar til að fríið yrði aðeins sjö dagar en þeirri tillögu var einnig hafnað og verður ekkert sumarfrí fyrir félög Bestu deildarinnar á þessu ári.
Lagt var til að fríið myndi vera í júlí en samtökin voru opin fyrir því að ræða aðra dagsetningu.