Það eru litlar líkur á að bakvörðurinn Jordi Alba hefði skrifað undir hjá Inter Miami ef vinir hans væru ekki leikmenn liðsins.
Alba viðurkennir þetta sjálfur en hann gekk í raðir Miami eftir að Lionel Messi og Sergio Busquets höfðu skrifað undir – síðar gekk Luis Suarez einnig í raðir félagsins.
Þessir fjórir leikmenn spiluðu allir með Barcelona á sínum tíma og þekkja það vel að vinna alla þá titla sem eru í boði.
,,Ég verð aldrei þreyttur á því að vinna titla. Ég vil halda áfram að vinna og berjast um alla titla,“ sagði Alba.
,,Ef ég væri ekki spenntur fyrir þessu verkefni þá væri ég ekki hérna, ég hefði haldið mig heima í Barcelona og lagt skóna á hilluna.“
,,Þetta tilboð var spennandi og ég vildi líka spila með Messi og Sergio Busquets á ný sem gerði tilboðið meira freistandi.“