Landsliðsmaðurinn Logi Tómasson var gestur Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Logi, sem spilar með Stromsgodset í Noregi, var í fyrsta sinn valinn í landsliðið fyrir mótsleiki í september á þessu ári.

„Mér fannst ég standa mig nokkuð vel eftir að ég fékk kallið. Ég var búinn að bíða smá tíma eftir því,“ sagði Logi, sem hefur átt góðu gengi að fagna í Noregi.

Logi stal svo öllum fyrirsögnunum um mánuði síðar er hann kom inn á gegn Wales í stöðunni 0-2. Hann minnkaði muninn með glæsimarki og átti svo jöfnunarmarkið með húð og hári þó það hafi að vísu ekki verið skráð á hann.

„Þetta var rosalegt. Þetta var smá eins og eftir að ég skoraði markið á móti Val (með Víkingi 2019), þetta var smá yfirþyrmandi, eftir á líka.

Fyrra markið var náttúrulega sturlað en eftir seinna markið, sem ég fékk náttúrulega ekki skráð á mig, maður sneri sér við búinn að jafna leikinn, komandi inn á sem vinstri bakvörður í stöðunni 0-2. Þú býst ekki við því að þú sért að fara að gera þetta, heldur bara spila fínan leik. Maður er með þetta í vopnabúrinu og það er bara bónus fyrir mig sem bakvörður að geta breytt leikjum,“ sagði Logi.

Umræðan í heild er í spilaranum.

Íþróttavikan er í boði Bola léttöl, Lengjunnar og Happy Hydrate