Það verða töluverðar breytingar á leikmannahópi Vestra fyrir næsta tímabil en frá þessu segir í færslu á vef félagsins.

Eins og fram hefur komið í fréttum sagði Eiður Aron Sigurbjörnsson upp samningi sínum á dögunum og mun Vestri ekki bjóða leikmanninum nýjan samning á þessum tímapunkti.

Sömu sögu er að segja með markvörðinn William Eskelinen en hann mun ekki snúa aftur vestur. Vestri hefur einnig sagt upp samning við varnarmanninn Jeppe Gertsen og þá voru samningar við Inaki Rodríguez, Benjamin Schubert og Aurelin Norest að renna út og verða þeir ekki framlengdir.

„Stjórn Vestra vill þakka þessum leikmönnum fyrir tíma sinn og þjónustu við Vestra og óskar þeim velfarnaðar i framtíðinni,“ segir á vefnum

Andri Rúnar Bjarnason og Vestri hafa komist að samkomulagi um að enda samstarfið. Vegna fjölskylduaðstæðna mun Andri ekki hafa tök á því að vera búsettur fyrir vestan fjarri fjölskyldu sinni.

„Við þökkum Andra kærlega fyrir samstarfið og óskum honum velfarnaðar. Með svona breytingum er mikil áskorun að finna nýja leikmenn en í því felast einnig gífurleg tækifæri til að gera betur og breyta til. Áfram Vestri,“ segir á vef Vestra.