Chris Kirkland fyrrum markvörður Liverpool var á barmi þess að taka eigið líf eftir að hafa verið háður pillum um langt skeið. Kirkland segir frá þessu í nýlegu viðtal.

Kirkland átti farsælan feril en það var árið 2012 þegar hann samdi við Sheffield Wednesday að líf hans fór í vonda átt.

Hann hafði glímt við meiðsli í baki og ákvað sjálfur að byrja að taka Tramadol sem er gríðarlega sterkt verkjalyf.

„Vandamál mitt var að vera svo lengi að heiman, ég saknaði þess að sækja dóttir mín í skólann og sjá hana leika sér. Að labba með hundana mína, allt þetta venjulega líf sem ég hafði þegar ég var hjá Liverpool og Wigan,“ sagði Kirkland.

„Ég þurfti að leggja af stað á æfingar 05:45 á morgnana og vera mættur á æfingasvæðið á undan öllum öðrum. Ég var svo stressaður að ég fór að taka meira af þesum töflum út af kvíða.“

„Þú átt að nota í mesta lagi 400mg á dag af Tramadol en ég var farin að taka 2500mg á dag. Ég var með þetta í tösku sem ég tók út á æfingar og fékk mér þá líka. Þetta var ekki vegna verkja, ég var háður þessu. Þetta var það fyrsta sem ég hugsaði um þegar ég vaknaði og síðasta sem ég hugsaði um þegar ég sofnaði.“

Kirkland lét engan vita af þessari fíkn sinni en töflurnar eru í dag komnar á bannlista hjá íþróttafólki. „Þetta er hættulegt, ég var oft að detta út, var með hjartavandamál og var illt. Þetta getur drepið þig, þetta hefði átt að drepa mig og gerði það næstum því.“

Einn daginn var Kirkland nær dauða en lífi. Hann tók haug af pillum og fór upp á efstu hæð í blokk og grét. Hann ætlaði að taka eigið líf. „Ég ætlaði að hoppa,“ sagði Kirkland.

Hann ákvað á síðustu stundu að hringja í eiginkonu sína og fór í meðferð. Hann féll aftur í sama farið í COVID faraldrinum en hefur nú í tvö og hálft ár verið edrú.

Kirkland er nú í því að halda fyrirlestra um reynslu sína og segir hann þetta verkjalyf stórhættulegt og ávanabindandi.