Markvörðurinn Jökull Andrésson var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni þennan föstudaginn, en þátturinn kemur út á 433.is vikulega.
Jökull lék á láni hjá Aftureldingu seinni hluta leiktíðar í Lengjudeildinni og átti stóran þátt í að koma liðinu upp í efstu deild. Kappinn er samningsbundinn Reading en hefur verið lánaður víða þaðan undanfarin ár. Síðustu tvö lán hafa ekki heppnast eins og best verður á kosið.
„Ég er búinn að eiga tvö mjög erfið ár úti í Englandi. Síðast með Carlisle þar sem ég var inn og út og að glíma við meiðsli. Þar áður var það Morecambe, sem létu mig fara eftir hálft tímabil. Það er alveg brekka fyrir markmann, við getum verið viðkvæmar sálir,“ sagði Jökull í þættinum.
Fyrir tímann hjá Morecambe og Carlisle var Jökull á láni hjá Exeter, þar sem hann er dýrkaður og dáður.
„Án þess að hljóma eins og egóisti var ég eins og einhver guð í Exeter. Ég er enn að fá skilaboð um að stuðningsmenn sakni mín. Það gerðist eitthvað þar sem var bara draumur,“ sagði Jökull, sem tók svo skrefið til Morecambe.
„Ég fór upp um deild og í Morecambe en komst að því á undirúningstímabilinu að ég er ekki jafnmikill kóngur og ég hélt. Ég var bara eitthvað eftir á, ég veit ekki af hverju. Ég spilaði ekki fyrsta leik en er svo kominn í markið í næsta leik. Svo fer þjálfarinn bara að skipta okkur markvörðunum á 4-5 leikja fresti. Við erum ekki eins og útileikmenn. Markmenn þurfa tíma. Við þurfum að aðlagast varnarlínunni og öllu.“
Jökull talar þá ekki sérlega vel um borgina Morecambe norðvestur hluta Englands.
„Ég var að flytja út í rassgat á Englandi. Ég var á þessum viðbjóðslega stað, búinn að búa í Reading þar sem er mjög gott að búa, og þetta var eiginlega bara menningarsjokk. Ég hugsaði bara um það hvert ég væri kominn, hvað ég væri að gera þarna.
Ég kemst aldrei á ról og í janúar segir þjálfarinn við mig: „Heyrðu meistari, við bara viljum þig ekki lengur.“ Það er eitthvað sem þú verður bara að taka, annað hvort brýtur þetta þig eða þú ákveður að verða betri.“
Íþróttavikan er í boði Bola léttöl og Lengjunnar
