Það kom nokkuð á óvart í gær þegar Valur sendi út tilkynningu þess efnis að Pétur Pétursson væri hættur sem þjálfari kvennaliðs félagsins. Var honum sagt upp störfum samkvæmt öruggum heimildum 433.is

Í tilkynningu Vals segir að um sé að ræða samkomulag. Samkvæmt heimildum 433.is var það af frumkvæði stjórnar Vals sem farið var þessa leið. Pétur var því rekinn úr starfi, samkvæmt heimildum 433.is er ákvörðunin mjög umdeild á Hlíðarenda.

Pétur hafði talað um það eftir tímabilið að hann yrði áfram. „Ég er með tveggja ára samning við Val og það er staðan eins og hún er í dag,“ sagði Pétur við Fótbolta.net eftir tímabilið.

Nú er hins vegar ljóst að Pétur er hættur eftir að nýkjörin stjórn knattspyrnudeildar Vals vildi ráðast í breytingar. Stjórnin tók til starfa á síðasta mánudag.

Elísabet Gunnarsdóttir fyrrum þjálfari liðsins er strax sterklega orðuð við starfið en hún er án starfs.

Pétur hafði unnið fjóra íslandsmeistaratitla og tvo bikarmeistaratitla frá því að hann tók við liðinu árið 2017. Er Pétur búinn að vinna frábært starf á Hlíðarenda en Valur endaði í öðru sæti í Bestu deild kvenna í sumar eftir tap gegn Breiðablik í síðustu umferð.