Víkingur tapaði á grátlegan hátt gegn írska liðinu Shamrock Rovers í seinni leik liðanna í 1. umferð undankeppni Meistaradeildar Evrópu í gær.

Fyrri leik liðanna hér heima lauk með markalausu jafntefli en Írarnir komust í 2-0 á heimavelli í gær. Í hálfleik kom Nikolaj Hansen inn á sem varamaður fyrir Víking og minnkaði hann muninn á 58. mínútu. Á 8. mínútu uppbótartíma klikkaði hann hins vegar á vítaspyrnu sem hefði tryggt Víkingi framlengingu.

Hörður Ágústsson sér um samfélagsmiðla Víkings og sagði hann frá því á X (áður Twitter) í gær að hann hefði ekki undan að eyða ógeðfelldum ummælum frá aðilum sem veðjuðu á leikinn og töpuðu peningum á tapi Víkings.

„Jæja næstu 50 mínútur fara í að eyða líflátshótunum og ógeðslegum kommentum á Facebook/Instagram/Twitter síðum Víkings. Allt frá aðilum sem voru að veðja á leikinn. Djöfull er þetta lasið,“ skrifaði Hörður.

„Þetta er btw svona sama hvernig leikir fara. Ekkert hægt að gera nema eyða mörgum klukkutímum á viku í þetta til að gerpi sem hóta ofbeldi/morði fái ekki að koma nálægt einhverju sem snýst ekkert um íþróttina sem þessi fífl eru að veðja á,“ skrifaði hann enn fremur.

Jæja næstu 50 mínútur fara í að eyða líflátshótunum og ógeðslegum kommentum á Facebook/Instagram/Twitter síðum Víkings.

Allt frá aðilum sem voru að veðja á leikinn. Djöfull er þetta lasið.

— Hörður  (@horduragustsson) July 16, 2024