Segja má að Age Hareide hafi í gær klárað sitt fyrsta ár í starfi sem landsliðsþjálfari Íslands. Liðið tapaði þá 4-0 gegn Hollandi.
Hareide stýrði íslenska liðinu í fyrsta sinn þann 17 júní árið 2023 þegar liðið tapaði gegn Slóvakíu á heimavelli.
Síðan hefur Hareide stýrt liðinu fjórtán sinnum og unnið sex leiki. Þrír af sigrunum sex hafa komið í vináttulandsleikjum.
Í leikjunum fjórtán hefur íslenska liðið skorað nítján mörk en fengið á sig tuttugu, markatalan er því í mínus eftir þetta ár Hareide í starfi.
Af þessum fjórtán leikjum hefur liðið tapað sjö undir stjórn hans og gert eitt jafntefli. Sigurhlutfallið er 43 prósent.
Hareide er með samning við KSÍ næstu árin en stjórn KSÍ getur í nóvember nýtt sér uppsagnarákvæði í samningum, sé sambandið á þeim buxunum að betri mann sé hægt að finna í starfið.
