Gregg Ryder, þjálfari KR, ræddi við Stöð 2 Sport í kvöld eftir leik sinna manna við Breiðablik í Bestu deildinni.
Um var að ræða ansi fjörugan leik en Blikar höfðu að lokum betur 3-2 í Vesturbænum þar sem öll mörkin voru skoruð í seinni hálfleik.
Gregg var vonsvikinn með tapið og vildi meira frá sínum mönnum en KR virtist missa hausinn aðeins eftir fyrsta mark þeirra grænklæddu.
,,Ég er mjög vonsvikinn með að hafa tapað þessum leik, við þurftum að halda okkur inni í leiknum eftir fyrsta markið,“ sagði Ryder við Stöð 2 Sport.
,,Það sést að við munum alltaf fá tækifæri á heimavelli og skorum að lokum tvö mörk en ef við hefðum haldið stöðunni lengur væru úrslitin mögulega önnur.“
,,Við vorum ekki eins einbeittir og í fyrri hálfleiknum. Við gáfum þeim tvö ódýr mörk.“
Gregg var svo spurður út í gula spjaldið sem hann fékk í viðureigninni.
,,Ég held að ég hafi ekki fengið gult spjald, er það? Kannski, ég veit það ekki. Ég vil ekki tjá mig um dómarana.“
