Valur tilkynnti í gær um komu Gylfa Þórs Sigurðssonar til liðsins. Besta deildin býður hann velkominn með skemmtilegu myndbandi.
Þessi markahæsti landsliðsmaður í sögu Íslands er sem stendur með liðinu í æfingaferð, en hann hefur verið sterklega orðaður við Hlíðarendafélagið. Nú er hann genginn í raðir félagsins og tekur slaginn með því í Bestu deildinni í sumar.
Gylfi sneri aftur á völlinn í haust með Lyngby og íslenska landsliðinu en hann rifti samningi sínum við Lyngby vegna meiðsla í vetur og fór í endurhæfingu á Spáni.
Gylfi er einn fremsti leikmaður Íslandssögunnar, á yfir 80 A-landsleiki og hefur skorað í þeim 27 mörk, flest allra.
Þá hefur Gylfi spilað fyrir Tottenham, Everton og Swansea í ensku úrvalsdeildinni, svo eitthvað sé nefnt.
Þrátt fyrir að hafa snúið aftur í landsliðið í haust er talið ansi ólíklegt að hann verði í hópnum fyrir umspilsleikinn gegn Ísrael síðar í þessum mánuðum. Tilkynnt verður um það í dag.
Hér að neðan má sjá myndband Bestu deildarinnar til heiðurs Gylfa.
Velkominn í Bestu deildina Gylfi ⚽️ #bestadeildin pic.twitter.com/QoWQrfpabL
— Besta deildin (@bestadeildin) March 14, 2024
