Það eru engar líkur á að bláa spjaldið verði notað í leikjum á vegum FIFA en þetta segir forseti sambandsins, Gianni Infantino.

Bláa spjaldið hefur verið í umræðunni undanfarnar vikur og eru einhverjar líkur á að það verði notað í bikarkeppnum á næstu árum.

Ef leikmaður fær blátt spjald er hann sendur af velli í tíu mínútur – tvö blá spjöld myndu þýða rautt spjald líkt og ef leikmaður fær tvö gul spjöld.

,,Þetta er umræðuefni sem er í raun ekki til fyrir okkur. FIFA er algjörlega á móti bláa spjaldinu,“ sagði Infantino.

,,Þetta mun aldrei gerast, við verðum að vera raunsæir. Við erum alltaf opnir fyrir hugmyndum og þeim verður sýnt virðingu.“

,,Þú þarft líka að virða leikinn og hefð fótboltans – það er ekki til neitt blátt spjald.“