Það er í raun eitt nafn sem er mest orðað við þjálfarastarfið hjá Liverpool en það er Spánverjinn Xabi Alonso sem starfar fyrir Bayer Leverkusen í dag.

Alonso er fyrrum leikmaður Liverpool og hefur gert stórkostlega hluti með Leverkusen í vetur – liðið er í toppsætinu í Þýskalandi og er með níu fingur á titlinum.

Rafael Benitez, fyrrum stjóri Liverpool, varar félagið þó við því að ráða Alonso en hann býr ekki yfir mikilli reynslu í bransanum.

Það yrði allt annað starf að taka við af Jurgen Klopp í sumar en að reyna fyrir sér hjá þýska félaginu.

,,Hann er stórt nafn í bransanum, hann er mikill atvinnumaður og klár strákur. Hann hefur gert vel og ég skil af hverju hann er orðaður við Liverpool,“ sagði Benitez.

,,Það er ekki auðvelt að heimsækja nýtt land og ná árangri og hann hefur gert svo vel. Hann er með hæfileikana í að verða frábær þjálfari og ef hann er með góða leikmenn innanborðs mun hann gera það.“

,,Getur hann gert þetta í fimm eða tíu ár? Ég veit ekki með það. Hann gæti tekið við hvaða stórliði sem er í dag og þeir myndu búast við titlinum. Ef þú hafnar í öðru sæti þá er það mögulega fínt tímabil en margir munu segja að honum hafi mistekist verkefnið.“