Theodór Elmar Bjarnason, fyrrum landsliðsmaður og leikmaður KR, var gestur í nýjasta þætti Íþróttavikunnar. Helgi Fannar Sigurðsson og Hrafnkell Freyr Ágústsson hafa umsjón með þættinum, sem kemur út alla föstudaga á 433.is, Hringbraut.is og í Sjónvarpi Símans.
Það virðast vera bjartari tímar framundan hjá KR og Elmar er stórhuga fyrir komandi leiktíð.
„Klúbburinn er ábyggilega með eitthvað langtímaplan og Gregg (Ryder nýr þjálfari KR) hefur talað um að hann vilji vinna eitthvað á hans þremur árum hér. Ég á tvö ár eftir og vil vinna eitthvað áður en ég hætti. Ég þoli ekki þegar menn eru eitthvað rægir við að gefa það út að þeir vilji vinna. Ég mæti öllum liðum á Íslandi með þá trú að ég geti unnið þau. Það er ekkert öðruvísi núna. Það þarf allt að ganga upp svo það takist og eins og er eru Víkingar með breiðari hóp en við og búnir að vinna lengur saman. En ég stefni á titilinn.“
KR var í sjötta sæti í fyrra en hefur nú styrkt leikmannahópinn sinn með Aroni Sigurðarsyni og Alex Þór Haukssyni. Félagið ætlar sér að gera meira á markaðnum.
„Síðan ég kom heim erum við búnir að taka þriðja, fjórða og sjötta sæti. Sérstaklega sjötta sætið er ekki ásættanlegt í Vesturbænum og ekki ásættanlegt fyrir keppnismann eins og mig. Mér fannst það ömurlegt og var ekkert eðlilega pirraður í fyrra. Það er mjög ánægjulegt fyrir mig að það sé að birta til í Vesturbænum,“ sagði Elmar.
Umræðan í heild er í spilaranum.
