Samúel Sigurjón Samúelsson, formaður knattspyrnudeildar Vestra á Ísafirði er verulega ósáttur með Ísafjarðarbæ og hvernig bærinn stendur að málum er varðar fótboltann í bænum.

Í fleiri ár hafa forráðamenn Vestra reynt að berjast fyrir betri aðstöðu en liðið er nú komið upp í efstu deild.

Lagður var æfingavöllur með gervigrasi í haust en hann hefur ekki nýst eins og vonir stóðu til um, vantað hefur að hreinsa völlinn til að meistaraflokkurinn og aðrir flokkar geti nýtt hann.

Í dag tók svo bærinn þá ákvörðun um að hætta samningi við Vestra um að félagið sjálft sæi um vallarmálin og umhirðu hans auk þrifa í félagsheimilinu þar sem búningsklefarnir eru.

Hafði Vestri séð um þetta í þrjú ár og segir Samúel í samtali við 433.is að það hafi genið vel og um miklu betur en þegar Ísafjarðarbær sá um málið, nú ætli bærinn að taka þetta aftur yfir og er Samúel ekki skemmt.

Samúel er harðorður í færslu sinni á Facebook. „Það er hreint með ólíkindum hvernig Ísafjarðarbær reynir markvisst að vinna gegn knattspyrnu hérna í bænum. Allar þær leiðir sem við kjósum og viljum vinna í satt og samlyndi með bænum eru skotnar niður,“ skrifar Samúel í færslu á Facebook.

Samúel er farin að hallast að því að þeir sem stjórna bænum myndu glaðir fagna því ef Vestri myndi hreinlega leggja niður knattspyrnudeildina.

„Kæmi mér ekki á óvart ef að Ísafjarðarbær myndi hreinlega óska eftir því að það verði ekki spilaður fótbolti hér í bæ. Það er hreinlega allt gert til að sjá til þess að það kosti vandræði og en meiri vinnu heldur en fyrir er. Takk kærlega fyrir bæjarstjórn Ísafjarðarbæjar !.“

Samúel er þekktur fyrir að liggja ekki á skoðun en hans ásamt öðrum hefur lagt mikið á sig til að koma Vestra upp í efstu deild sem hefur nú tekist.