Virgil van Dijk var í viðtali við The Times á dögunum og þar gaf hann í skyn að hann gæti farið að huga að brottför frá Liverpool.

Jurgen Klopp tilkynnti fyrir helgi að hann myndi hætta sem stjóri Liverpool eftir tímabilið. Í viðtalinu var Van Dijk spurður að því hvort hann yrði partur af nýjum kafla Liverpool.

„Það er góð spurning. Ég veit það ekki,“ sagði hollenski miðvörðurinn, sen samningur hans rennur út eftir næstu leiktíð.

„Félagið á stórt verkefni fyrir höndum og margt mun breytast. Mig langar að vita í hvaða átt félagið vill fara. Við sjáum hvað setur,“ sagði hann jafnframt.

Í kjölfarið velta enskir miðlar því upp hvert Van Dijk fer næst og rifja þeir einnig upp ummæli hans frá því í viðtali við Gary Neville árið 2022. Þar gaf Van Dijk í skyn hvert hann gæti farið í framtíðinni.

„Camp Nou í Barcelona er uppáhalds leikvangurin minn. Ég horfði mikið á Barcelona þegar ég var yngri og að sjá leikvanginn þeirra var ótrúlegt. Svo spilaði ég þar með Celtic og það var erfitt. Við töpuðum 6-1. 

Ég naut þess samt að spila þar. Flöturinn er mjög stór. Þetta er algjör bilun,“ sagði Van Dijk á sínum tíma, en hann hefur einnig játað aðdáun sína á goðsögnum Börsunga eins og Lionel Messi og Ronaldinho.