Manchester United ætti að horfa til Sádi Arabíu í janúarglugganum í leit að framherja sem getur aðstoðað Rasmus Hojlund í vetur.

Hojlund hefur leitt línu United á tímabilinu en er aðeins með eitt mark í 15 deildarleikjum hingað til.

Flestir eru sammála um að þessi tvítugi strákur sé ekki tilbúinn í að vera nía United svo ungur að aldri og þarf hann meiri tíma til að aðlagast ensku úrvalsdeildinni.

Louis Saha, fyrrum framherji United, telur að félagið ætti að horfa til Karim Benzema sem gerði garðinn frægan með Real Madrid.

Benzema er 36 ára gamall og leikur með Al-Ittihad og hefur þar skorað níu mörk í 15 leikjum.

,,Benzema mun hrista upp í hlutunum í framlínu Manchester United og það er það sem þeir þurfa,“ sagði Saha.

,,Hann mun alltaf skora sín mörk og mun tengja spilið mun betur. Þetta er bara minn draumur en Karim er enn mikill atvinnumaður og er framherji sem Hojlund getur lært af.“