Íþróttavikan heldur áfram að rúlla á 433.is og í Sjónvarpi Símans en nýr þáttur kemur út alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum og að þessu sinni var gesturinn Arnar Gunnlaugsson, þjálfari Víkings.

Víkingur er að rúlla yfir Bestu deild karla og er bikarmeistari einnig. Arnar segir að velgengninni fylgi að menn vilji ólmir sigra þá.

„Það eru svo margir að hjálpast að við að vinna okkur. Aðrir eru að fá hjálp frá sérfræðingum í Stúkunni til að vinna okkur. Þetta er heiður fyrir mig,“ segir hann.

Einnig var það tekið fyrir sem sumir hafa haldið fram um að Víkingur sé gróft lið.

„Þegar það er talað um að Víkingur sé grófasta liðið þá má tékka aðeins á tölfræðinni. Við erum grjótharðir en ég vil ekki meina að við séum grófir. Svo koma staðreyndirnar inn í þetta. Við erum búnir að fá fæst gul spjöld í deildinni og við erum á meðal liða sem fær dæmd á sig hvað fæst brot. Svona ummæli hafa kannski áhrif á dómara og þá geta svona atriði farið að falla gegn okkur.“