Það var á 79. mínútu í stöðunni 1-0 fyrir ÍA sem leikmaður Keflavíkur sparkaði boltanum í innkast vegna meiðsla leikmanns ÍA. Skagamenn tóku innkastið og bjuggust við því að boltanum yrði sparkað aftur til Keflvíkinga eins og venjan er í slíkum tilfellum.
Bjarni skaut hins vegar frá miðju og skoraði, eitthvað sem hann og Skagamenn vildu meina að væri algjört óviljaverk.
Einar Orri var þarna á bekknum og var spurður út í viðbrögðin þar.
„Það var ekkert talað um neitt. Það voru bara allir brjálaðir, allir að öskra og góla,“ segir hann í Þungavigtinni.
Kappinn kom svo inn á en fékk rautt spjald fyrir svakalega tæklingu á Bjarna skömmu síðar.
„Það kom tækifæri. Þeir taka miðju og senda hann til baka á Bjarna. Ég var ekki mættur til að meiða hann en ég var mættur til að taka boltann og hann. Hann mátti alveg finna fyrir því.
Ég fer bara inn í klefa og heyrði lætin eftir leik. Þegar ég var að labba upp og inn í klefa var ekkert verið að klappa fyrir mér. Þetta var alvöru. Svo verður bara allt brjálað. Það var gjörsamlega allt tryllt þarna,“ segir Einar Orri en Keflvíkingar eltu Bjarna inn í klefa eftir leik.
„Menn voru bara öskrandi. Einhverjir vildu fara inn í Skagaklefann og einhverjir voru að öskra á hvorn annan. Þetta var svakalegt.“
Atvikið heltók umræðunni lengi vel á eftir. Einar Orri var meðal annars beðinn um að mæta í Kastljósið en varð ekki við því.
Einar Orri segist löngu vera búinn að fyrirgefa Bjarna í dag.
„Þetta er löngu grafið. Hann er frábær leikmaður en líklega smá dirty.“
Hér að neðan má sjá atvikið fræga sem um ræðir.