„Menn eru aðeins að komast niður. Ég hef ekki mætt Víkingi svona slökum,“ sagði Höskuldur Gunnlaugsson fyrirliði Breiðabliks á Stöð2 Sport eftir 2-2 jafntefli gegn Víkingi í kvöld.

Rosaleg dramatík var í Kópavogi þar sem Víkingur var 0-2 forystu gegn Blikum þegar komið var í uppbótartíma.

Danijel Djuric og Birnir Snær Ingason skoruðu mörk bikarmeistaranna í sigri á Íslandsmeisturunum. Gísli Eyjólfsson lagaði stöðuna fyrir Blika í uppbótartíma.

Það var svo Klæmint Olsen sem jafnaði fyrir Blika í uppbótartíma. Allt sauð upp úr eftir það þar sem Sölvi Geir Ottesen aðstoðarþjálfari Víkings fékk rautt spjald.

„Þeir missa hausinn, þeir voru að hrinda okkar mönnum, Það lýsir unprofessional, stælar. Litlir hundar sem gelta hátt, misstu hausinn,“ sagði Höskuldur.

Höskuldur segir að Víkingar pakki bara í vörn. „Þeir eru bunir að læra það að parka rútunni, tvö klaufaleg moment hjá okkur. Grátlegt því á milli teiganna var þetta okkar leikur.“