The Athletic segir frá því í dag að Manchester United hafi hafnað nokkrum fjölda tilboða frá liðum í Tyrklandi sem vilja kaupa Mason Greenwood.
United fer nú ofan í saumana á máli Greenwood sem var ákærður hjá lögreglu fyrir ofbeldi og kynferðisbrot í nánu sambandi. Málið var látið niður falla fyrr á þessu ári þegar vitni breyttu framburði sínum og ný gögn komu á borð lögreglu.
United vill hins vegar ekki hleypa Greenwood á æfingar en hann hefur verið í banni hjá félaginu frá því í janúar árið 2022 þegar hann var handtekinn.
United rannsakar málið sjálft og skoðar hvort þessi 21 árs gamli leikmaður eigi afturkvæmt hjá félaginu.
The Athletic fer ítarlega ofan í málið og tjáir starfsmaður hans sig við miðilinn. „Það eru ekki neinar handbærar sannanir, þetta eru gamlar fréttir, sögusagnir og hálfur sannleikurinn. Mason er 21 árs, hann var hreinsaður af ásökunum og á að fá tækifæri til að endurbyggja líf sitt og halda áfram,“ er haft eftir manninum.
Búist er við að United taki ákvörðun um framtíð Mason á næstu dögum en hann er að verða faðir í fyrsta sinn í sumar og gekk í það heilaga með unnustu sinni á dögunum.
