Fari svo að Manchester City verði sent niður um deild eða deildir í refsiskyni vegna brota á fjármálareglum ber deildunum fyrir neðan engin skylda að taka við félaginu.

City gæti verið í slæmum málum eftir að enska úrvalsdeildin ákærði félagið í yfir hundrað liðum og sakar félagið um að brjóta reglur um fjármál félaga.

Rannsókn hefur staðið yfir í fjögur ár en ákærurnar voru birtar í gær. Í yfirlýsingu segir að meint brot hafi átt sér stað frá 2009 til ársins 2018.

„Félagið er grunað um að hafa ekki skilað af sér réttum upplýsingum þegar kemur að tekjum, tengdum aðilum og kostnaði,“ segir í yfirlýsingu deildarinnar.

Á þessum tíma varð City meðal annars enskur meistari í þrígang. Möguleiki er á því að félaginu verði refsað með því að stig verði tekin af því eða þaðan af verra, eins og að það verði fellt niður um deild.

City er sakað um að hafa farið frjálslega með sannleikann þegar kemur að styrkarsamningum og samningum við leikmenn.

The Telegraph segir að ensku neðri deildunum (The English Football League) yrði hins vegar ekki skylt að taka við City þangað. Félög sem falla úr ensku úrvalsdeildinni þurfa að sækja um að spila í deildinni fyrir neðan hjá ensku neðri deildunum.

Aðeins er pláss fyrir 72 lið í A, B og C deild. Það þyrfti því að leita annara lausna til að koma City fyrir þar.

Ljóst er að refsing af þessu tagi yrði sú allra harðasta sem City gæti orðið fyrir og alls ekki ljóst að af verði.