Gary Neville fyrrum fyrirliði Manchester United er brjálaður yfir því að enn á ný sé leki að koma úr klefanum hjá Manchester United þar sem á að grafa undan þjálfaranum.

Í vikunni birtust fréttir af því að 50 prósent leikmanna United vildi losna við Ten Hag úr starfinu.

Þetta hefur gerst með síðustu þjálfara sem hafa svo misst starfið eftir að hafa tapað klefanum, Neville hefur fengið nóg af svona fréttum.

„Ég hef verið linur við leikmennina í tólf mánuði og kennt eigendum félagsins um ömurlegt andrúmsloft í félaginu,“ segir Neville.

„En það versta sem getur gerst í fótbolta er þegar klefinn, leikmenn og þeirra umboðsmenn eru að leka í fjölmiðla og reyna þannig að grafa undan þjálfaranum og samherjum sínum.“

„Þetta er ófyrirgefanlegt, ég varð reiður þegar ég heyrði þetta núna. Þeir eru að reyna að láta reka þjálfarann á nýjan leik.“