Bruno Fernandes, fyrirliði Manchester United, missir af næsta leik gegn Liverpool þar sem hann er kominn með fimm gul spjöld í ensku úrvalsdeildinni á leiktíðinni. Það fimmta kom í skelfilegu 0-3 tapi United gegn Bournemouth um helgina.
Spjaldið fékk Fernandes fyrir að kvarta í dómaranum undir lok leiks, en menn voru orðnir verulega pirraðir á gangi mála.
Einhverjir hafa haldið því fram að Portúgalinn hafi vitað af leiknum gegn Liverpool og einfaldlega ekki viljað spila hann eftir gengi United á tímbilinu.
„Kannski vildi hann ekki fara á Anfield, ekki myndi ég vilja það núna. Ég veit samt ekki hvort þú sért að hugsa um næsta leik á meðan þú ert að spila,“ segir Michael Owen, en hann lék fyrir bæði Liverpool og Manchester United á ferlinum.
Sjónvarpsmaðurinn Richard Keys er harður á því að Fernandes hafi viljandi fengið spjald og þar af leiðandi leikbann gegn Liverpool.
„Fernandes vissi að hann myndi missa af leiknum gegn Liverpool ef hann hefði fengið gult. Hann vildi ekki spila þann leik. 0-3 undir og hann fær reiðiskast. Er þetta fyrirliði? Leiðtogi?“ skrifaði Keys á samfélagsmiðla.
