Nokkrir leikmenn Manchester United fá að fjúka þegar Sir Jim Ratcliffe eignast 25% hlut í félaginu ef marka má frétt breska götublaðsins The Sun.

Ratcliffe hefur stutt United allt sitt líf og ætlar sér að reyna að bæta árangur félagsins innan vallar þar sem lítið hefur gengið undanfarið.

Því mun fylgja að selja leikmenn sem ekki er talið að eigi sér framtíð hjá félaginu en þrír leikmenn sem munu að öllum líkindum fara á brunaútsölu í janúar eru þeir Antony, Jadon Sancho og Anthony Martial.

Þetta er ekki það eina sem Ratcliffe ætlar að gera en fyrr í dag var sagt frá því að eitt af því fyrsta sem hann muni gera verði að krefjast útskýringa á eyðslu félagsins í leikmenn undanfarin áratug frá því Sir Alex Ferguson hvarf á brott.

United hefur á þeim tíma eitt 1,4 milljarði punda í leikmenn sem flestir hafa lítið getað. Má nefna Paul Pogba á 85 milljónir punda, Antony á 89 milljónir punda, Romelu Lukaku á 75 milljónir punda, Jadon Sancho á 73 milljónir punda, Angel Di Maria á 60 milljónir punda, Anthony Martial á 45 milljónir punda og Donny van de Beek á 40 milljónir punda.

Titlarnir og árangurinn hafa ekki verið í samræmi við þetta og vill Ratcliffe útskýringar á hvernig félagið fór að þessu til að reyna að koma í veg fyrir þetta í framtíðinni.